~^.*~火鈴目の生活扎記~^.^~

一直以黎都好喜歡家庭生活，同屋企人關係都好好，亦希望即使結左婚，個family只會係extend左，而唔係嫁左出去就冇左。好羨慕身邊有d朋友，可以兩個family一齊去玩、相處得好開心，我有時都好想自己嘅family都可以係咁，但唔係想就可以。始終人夾人緣，或者各有各嗜好，又或者係事與願遺，想做未必一定可以做得到。呢個係現實深深咁體會到。

可能係工作、可能係生活節奏大不同，有時好想好想可以stick together with my parents、my family，但未必真係想stick together 就可以。又或者每個兄弟姊妹，都有自己嘅家庭嘅時候，就可能會更難。另一半夾唔到時間，甚或可能係夾唔埋。有時好想盡力去做，但唔係一個人嘅力量囉！唔係完完全全講緊我自己，只係突然間有感而發，打到呢度都覺得有點傷感

自從有左燉蛋之後，同朋友嘅相處少左，個心好掛住好掛住佢地，好想好想多d關心佢地，但原來真係好分身不暇咖！我同朋友出街，要帶埋個囝，但好多地方都去唔到，而且出街都只係換個地方去湊仔，又要就佢食野時間、又要同佢去換片，想坐低傾下計，可能囝囝又會唔耐煩，會扭計。你覺得冇所謂，我都會覺得唔好意思。聚會變左陪我湊仔，都真係會有d掃興吧！依然陪伴我左右嘅朋友，我真係衷心多謝你地嘅體諒。

喺我人生裡面，家庭、朋友真係好重要，但一個小朋友就令我無暇兼顧，覺得自己都真係有d冇用。希望朋友們明白，我從未離開過你地，只係冇時間，可能生活、步伐都變得不一樣，你地已經忘記了我，但我沒有，我心一直在！

眨下眼燉蛋9個月喇！本來今日諗住同佢同埋d親戚一齊去探佢個表BB，不過因為佢病左，所以冇去喇！要留喺屋企休息。

亦正正因為佢病+爛面，所以都冇同佢喺正日影相喇！

燉蛋今次好慘呀！受金黃葡萄球菌影響，塊面爛晒呀！而家食緊抗生素，希望佢快D好番啦！

好耐冇寫BLOG，講下佢9個月有咩新進展先~

社交能力﹕

佢而家已經識得同人WAVE GOODBYE喇！佢喺8個月時已經學識左，好開心呀！睇醫生時，醫生仲話8個幾月識，都算好叻喇！聽到醫生咁講，我仲開心！

8個幾月時，亦發現人地叫佢拍手，佢識拍手呀！真係好SURPRISE，呢個真係冇特別教佢咖！我諗佢係睇電視學番黎咖！講CLAP YOUR HANDS佢會即刻拍到添！！

而家教緊佢FLYING KISS，唔知佢幾時會學識呢﹖！

生理成長﹕

6個幾月時開始出左下顎兩隻門牙，到而家都冇咩進展喇！仲係兩隻牙~唔知幾時出上面果兩隻呢﹖！好期待

唔知由幾時開始，燉蛋就變得好痴人喇！初初我唔覺，只係以為佢扭計、扭抱，一放底就喊，但原來佢係撒嬌。因為之後我發現，由得佢喊一陣，唔使3分鐘佢就會自己玩。

痴人都唔緊要，佢好痴我囉！明明我同火頁仔都喺度，我見火頁仔睇住佢一陣，我上一陣網，佢可以不停係咁爬去我度，因為我冇望燉蛋，背住佢，我仲話火頁仔做咩唔睇住佢，火頁仔就話「唔關我事，佢係都要爬去你度」

前晚STAY左喺外家一晚，尋日起身，燉蛋就痴婆婆喇！婆婆一離開佢視線範圍佢就喊，我抱佢佢都喊，一過婆婆手就收聲。

hehe~其實我幾開心呀！因為咁就證明左如果撞啱媽咪得閒，我就可以同火頁仔拍下拖，放下假喇！話晒佢出世到而家我都冇放過假嘛！！


不過一定唔會係經常可以啦！一來俾完媽咪湊，我自己湊番一定會好辛苦(老人家都係縱孫咖嘛)。二來火頁仔而家一個月都唔知有冇放兩日假......

自從醫生講過叫燉蛋戒奶之後，都真係令我幾煩惱！！

見佢想飲奶時我唔夠俾佢，我都真係覺得好唔開心！好想俾佢飲！！

本來補緊FRISO，但有報導話有塑化劑，話晒燉蛋係男仔，雖然話唔超標啫！但積少成多，都係轉左為秒。

但一直飲人奶嘅佢，我又確實冇留意過D奶粉，試左豆漿，燉蛋第二日就唔肯飲。而家都係加DD奶粉佢先肯飲。我仲可以好有心機整豆漿俾佢咖！如果佢可以飲飲下只飲豆漿都好咖！

不過我媽咪就不停哦我，話咁細個唔可以飲奶，所以今日的起人肝搵奶粉。雖然都冇乜結果，不過都開始有D頭緒！！希望可以快D解決到奶粉呢個問題啦！

識嘅朋友俾D意見我啦！燉蛋有濕疹問題咖！！些些~

不經不覺燉蛋已經接近8個月了！我的母乳隨著他食固體食物增多而不斷減少了。

在他7個月時問過家庭醫生介紹奶粉，好讓給他補充一下。結果家庭醫生就著燉蛋的濕疹問題，建議我幫他戒奶。

很多朋友聽到後都覺得燉蛋才7個月，戒奶太快了。結果餵母乳的朋友都覺得奶粉其實有很多致敏原，醫生也說得對，在不只一個朋友建議我用豆漿代替奶的情況下，我決定試試看。

在超市買了有機黃豆。

就根據朋友教我的方法及黃豆包裝上的說明，試著造。

今日約左媽媽會D媽媽一齊去BB展行下！其實都冇諗定要買乜，不過如果有平就買下囉！

結果真係冇乜特別平，10點幾去到，等齊人入場，已經好多人喇！

攞增品嘅都排晒大隊，LUNCH後入場就簡直係人山人海。就算俾錢買野都排到你唔想排，想揀下野都逼到根本睇唔到！

好佩服有D大肚準媽媽一個人去行，我真係覺得佢地好勇。因為其實都幾危險。D人唔會理你、讓你，甚至會撞你。

我地帶BB嘅，雖然有架BB車，但一個唔小心，BB如果伸左對腳仔出黎俾人撞到，真係腳都冇

有時又會俾人推你推到撞到人，自己都覺得唔好意思。

今日同燉蛋返左屋企探下daddy，daddy見到燉蛋真係超鍾意佢，成日都話「俾我抱」見到daddy開心，我都好開心。

燉蛋食完粥通常都會便便，daddy就叫我同佢洗pat pat，結果媽咪直頭同佢沖埋涼。

喺呢個時候，媽咪叫我洗左個盆，然後俾佢沖，我就多口問我細個係唔係用呢個盆沖涼，媽咪話係喎！！

見到燉蛋用我用過嘅野，感覺真係好得意呀！！

為左證明媽咪講真，我地搵返我細個d出浴照睇下，結果真係有呀 不過我就喊住影喇！

燉蛋的第221天，他發燒了。

這算是第一次吧。(之前試過一次很微的，是打針後反應)

不是由我這個當媽媽的發現。是婆婆昨天來看他時發現的。

媽媽問我﹕「點解燉蛋咁熱嘅﹖」我答﹕「天氣熱未熱d囉！」

當媽媽第二次問我時，我忍不住拿探熱針探探，37.9度，真的微燒了。

又咁耐冇打blog添~自從要煮野俾燉蛋食之後，我都未得閒過......

話說燉蛋自從識得俾反應、識嗲人之後，我就開始對佢愛不釋手喇！點解咁講呢﹖﹖﹖

因為我會攬住佢瞓，有時唔想佢喊，就會抱佢。結果自己攞黎衰，發覺佢d性格係唔俾佢就誓不擺休，所以都係決定train番好佢。

尋晚佢喊想要痴住我瞓，結果我由得佢喊，喺佢喊到聲嘶力竭嘅時候，我同火頁仔都聽到佢喊「mami」，聽完聽得唔清楚，再有第二次「mami」。我覺得佢係喊而撞口卦，所以都冇放喺心。

今晚喺老爺屋企，燉蛋又無端端狂喊(可能因為出緊牙，佢好辛苦啦！)，我叔仔聽到佢喊住嗌阿媽，因為果刻我聽唔到，只係聽到我叔仔話「喊到嗌mami呀」

喺我依然覺得佢唔係嗌我嘅時候，上左媽媽會睇野，見人地寫左BB嗌BABA，咁我又問下囉！誰不知，有媽媽答我係算係嗌左我喎 唔係卦..........

燉蛋仲有10日就6個月喇！今日同妹妹帶左佢去studio影相，今次係燉蛋第一次，唔知佢表現點呢﹖！

結果唔知係唔係搭lift嘅時候俾個陌生姨姨引佢笑得太多，影嘅時候冇乜點笑

  

可能因為係佢第一次影，所以我睇到d相都好興奮咁俾錢買晒全部soft copy。

其實今次佢嘅皮膚狀態麻麻地咖！又出左d紅色一撻撻，不過又唔改得時間(團購買的)，所以就照去。

不過返到屋企同火頁仔一齊睇番，其實又好似唔係好多張好靚。好彩今次係團購買黎試下，唔係好貴，當平平地玩下囉！

今日係我生左燉蛋以黎，難得一晚輕鬆。

自從生左燉蛋之後，每日營營役役咁照顧佢，真係冇休息過，果種辛苦同開心嘅掙扎真係好...........唔知點講。

今晚一班五湖嘅朋友誠意拳拳，山長水又遠咁入黎探燉蛋，仲話同我去食飯、飲野，我真係感動到不得了(真係太附太耐冇同你地反喇！)。

  

食完個辣辣晚飯

今日整左紅蘿蔔蓉俾燉蛋試，所以順便整一條條俾佢試下食。其實佢冇牙唔會食到落肚，但就可以俾佢訓練下手仔拎野，同埋訓練佢手口協調。

  

為食嘅佢開頭都放得唔準，食唔到仲發脾氣添！不過之後就OK喇！

但佢食嘅時候要睇住佢，因為都驚佢放得太入呀！

呢個嘅好處係唔會好似餅餅咁食到周圍都係

經朋友介紹Healthy Times今日見到決定買黎俾燉蛋試下。其實之前試果隻唔係唔好，但唔係好多地方有得買，呢個又容易d買多，所以決定買黎試下。


手指餅就係見燉蛋最近食手指又多左而買俾佢咬下囉！！
  

不過佢開出黎比較稀，如果BB鍾意食杰的話，要用好多匙先開到杰。

注﹕燉蛋=砵砵，事緣媽咪叫砵砵本名(廣東話不太流利，俾佢同事笑佢叫左燉蛋)我覺得好可愛呀！所以決定以後叫砵砵做燉蛋。

話咁快就5個月喇！4至5個月呢段時期真係過得好快，可能因為開始為燉蛋引入固體食物啦！咁我嘅工作量又多左，所以每一日真係過得好快。

而且呢個月有好多好多燉蛋難忘的......已經坐得好穩，自己轉身(呢個仲要發生喺母親節)，第一次食糊仔，而且而家真係好識同人交流喇！

踏入4個月，真係發現燉蛋係我地嘅開心果，好容易笑得好開心，逗下佢就哈哈大笑，學人講野，依依呀呀可以講好耐，試過自己望住天花板講左成個鐘。

睇住佢每學識一樣野，真係好開心呀！而家踏入5個月喇！相信佢會有更多新野出現，要好好睇住佢先得喇！

我諗喺BB嘅成長過程裡面，頭一年係要買最多野嘅！

因為喺呢一年裡面，佢地成長得好快，學嘅野好多，所以好多野都係必需要買。

燉蛋開始食野，我又再忍唔住要為佢增添唔同嘅食具喇！

  
TOMMIE個STORAGE BOX真係好好用，唔好睇佢細細個，食物份量可以裝到大人碗嘅大半碗份量咖喇！而且又唔會因為熱漲冷縮而漏，真係又平又抵又好用。